“Russian Energy Week 2025” மாநாட்டில் பங்கேற்றார் வலுசக்தி அமைச்சர் பொறியியலாளர் குமார ஜயகொடி

“Russian Energy Week 2025” மாநாட்டில் பங்கேற்றார் வலுசக்தி அமைச்சர் பொறியியலாளர் குமார ஜயகொடி

இலங்கையும் ரஷ்ய கூட்டாட்சியும் இடையிலான வலுசக்தி துறையிலான ஒத்துழைப்பை மேலும் வலுப்படுத்தும் நோக்கில், வலுசக்தி அமைச்சர் பொறியியலாளர் குமார ஜயகொடி அவர்கள் “Russian Energy Week 2025” மாநாட்டில் பங்கேற்றார்.

அக்டோபர் 15 முதல் 17 வரை மாஸ்கோ நகரில் நடைபெற்ற இந்த மாநாட்டில் கலந்துகொண்ட அமைச்சர், இலங்கை–ரஷ்ய கூட்டாட்சி இருதரப்பு உறவுகளை வலுப்படுத்துவதோடு, குறிப்பாக வலுசக்தி துறையில் புதிய வாய்ப்புகள் மற்றும் உடன்பாடுகளை ஆராயும் நோக்குடன் இந்தப் பயணத்தை மேற்கொண்டார்.

மாநாட்டின் போது, ரஷ்ய கூட்டாட்சியின் வலுசக்தி அமைச்சர் மற்றும் துணை வலுசக்தி அமைச்சருடன், அதேபோல் வலுசக்தி துறையைச் சேர்ந்த உயர் மட்ட பிரதிநிதிகளுடனும் அமைச்சர் ஜயகொடி பயனுள்ள கலந்துரையாடல்களை மேற்கொண்டார். மேலும், “நிலைத்த அபிவிருத்தி இலக்குகள் மற்றும் வலுசக்தி” என்ற தலைப்பில் நடைபெற்ற குழு கலந்துரையாடலில் சிறப்பு உரையாற்ற அழைக்கப்பட்ட அவர், எதிர்கால வலுசக்தி இலக்குகளை அடைவது குறித்தும், வரவிருக்கும் மீள புதுப்பிக்கத்தக்க சக்தி நிகழ்ச்சிகள் குறித்தும் விரிவாக எடுத்துரைத்தார்.

இந்த கலந்துரையாடல்கள், மீள புதுப்பிக்கத்தக்க சக்தி துறையில் புதுமைகள் மற்றும் நவீன தொழில்நுட்பங்களின் பயன்பாடு, ஆற்றல் திறன் மேம்பாடு, மேலும் வலுசக்தி தொடர்பான அறிவுப் பகிர்வு ஆகிய விடயங்களை மையமாகக் கொண்டு நடைபெற்றன.

மேலும், இலங்கையின் வலுசக்தி மாற்றத் திட்டம், மீள புதுப்பிக்கத்தக்க சக்தி அபிவிருத்தி, சக்தி வள பாதுகாப்பு மற்றும் நிலைத்த அபிவிருத்தி தொடர்பான முயற்சிகளை அமைச்சர் விளக்கினார். உலகளாவிய அளவில் முன்னணி வலுசக்தி வழங்குநராகவும், புதுமைகளில் முன்னோடியாகவும் விளங்கும் ரஷ்ய கூட்டாட்சி, இவ்விலக்குகளை அடைவதற்கான ஒத்துழைப்பை வழங்கும் என அவர் நம்பிக்கை வெளியிட்டார்.

Russian Energy Week என்பது, சக்தி வள பாதுகாப்பு, புதுமை மற்றும் நிலைத்த தன்மை ஆகியவற்றை மையமாகக் கொண்டு நடைபெறும் உலகின் முக்கியமான வலுசக்தி மாநாடுகளில் ஒன்றாகக் கருதப்படுகிறது. இதில் அரச தலைவர்கள், சர்வதேச நிபுணர்கள், முதலீட்டாளர்கள் மற்றும் கொள்கை வடிவமைப்பாளர்கள் ஒன்று கூடி, வலுசக்தி துறையின் எதிர்கால சவால்கள் மற்றும் அவற்றை எதிர்கொள்ளும் வழிமுறைகள், தீர்வுகள் மற்றும் பரிந்துரைகள் குறித்து கலந்துரையாடுகின்றனர்.

இந்த நிகழ்வில், ரஷ்ய கூட்டாட்சிக்கான இலங்கைத் தூதுவர் திருமதி ஷோபினி குணசேகர, இலங்கை பெற்றோலியக் கூட்டுத்தாபனத்தின் தலைவர் ஜனக ராஜகருணா உள்ளிட்ட பல அதிகாரிகளும் பங்கேற்றனர்.